CAGAYAN DE ORO CITY – Nag-una ang Lanao del Norte nga dunay taas nga ihap sa mga tawo nga nangamatay gumikan sa pagtakboy sa sakit nga dengue gikan sa Enero hangtod Agosto ning tuiga.
Kini human anaa sa 26 gikan sa 60 ka tawo nga nangamatay ang naggikan sa nagkadaiyang lungsod sa probinsya ilabina sa Iligan City nga dunay 11 ang nakalas.
Miingon si DoH regional director Dr Adriano Suba-an nga nagsunod sa Lanao Norte ang Misamis Oriental diin 21 ka tawo ang nakalas ug walo niini ang gikan sa Cagayan de Oro City.
Nagbaton usab sa pinakadaghang natakbuyan sa dengue ang katawhan sa Bukidnon apan 10 ka tawo lamang ang namatay.
Giangkon ni Suba-an nga alarming na ang status sa mga kaso sa dengue sa rehiyon diin mitala na kini sa katibuk-ang 15-mil 095 sulod lamang sa Enero ngadto Agosto ning tuiga.
