CAGAYAN DE ORO CITY – Gihagit sa rank no. 6 sa Philippine Military Academy Bagong Henerasyon Gagampanang Tama Serbisyo,Integridad,Nasyonalismo ang Aming Gabay o PMA Bagong SINAG Class of 2024 Cadet Alexan Mye Valen ang kabatan-unan nga sudlan ang pagka-sundalo aron dugang puwersa sa pag-depensa sa seguridad sa nasud.
Gihimo sa Lanao del Norte pride PMAer ang pahayag nunot sa gitakda nila nga pag-graduwar sa akademya sa Baguio City sa umaabot adlaw’ng Sabado.
Namahayag si Valen nga dili lang trabaho apan dakong garbo sa matag-Pilipinhon nga maka-serbisyo sa yutang-tabanon ilabina nga nag-atubang sa sensitibong hadla sa seguridad ang Pilipinas gikan sa external security issues.
Si Valen ang dunay mga kaliwat nga aktibo ug kanhi mga sundalo rason nga misulod kini sa PMA ug nagsilbing rank no.6 sa 278 nga mo-graduwar sa adlaw’ng Sabado.
Namahayag si Alexan kinsa senior high school graduate dihang misulod sa PMA nga mas gusto niya magpaubos sa Philippine Army service kay magamit niini ang iyang abilidad ug mga nakat-unan sulod sa akademya.
Nadumduman pa niini nga sobra nila libo ka aplikante nga nagpasar sa PMA exams tuig 2019, 278 lang ang naka-survive nga gilangkuban sa 224 ka lalaki ingon man 54 ang mga babaye.
Hisayrang sa 15 ka aplikante gikan sa Northern Mindanao,13 ang lalaki ug duha lang ang babaye nga naglakip kang Alexan kinsa sa top 10 PMA achievers,siya ang ranked no. 6 nga mo-graduwar sa Baguio City sa Mayo 18 ning tuiga.
