CAGAYAN DE ORO CITY-Gikompirmar ni Police Supt. Madzgani Mukaraam, provincial director sa Lanao del Sur Police Provincial Office nga mihinay na ang grupo sa mga Maute-ISIS kinsa gipanguluhan ni Owayda Benito Marohomsar alyas Abu Dar.
Sumala pa ni Mukaraam, anaa nalang sa napulo ang nahabilin nga miyembro ni Abu Dar human mapatay sa sunod sunod nga engkwentro tali na sa militar.
Siya miingon nga mihuyang na ang Maute-ISIS tungod kay ang mga MILF na ang nag-lead sa Lanao del Sur ug ga-report na usab sa mga otoridad ang mga Maranao-Muslims sa panahon nga e-recruit sila sa mga terorista.
Gani, nakadawat sa report si Mukaraam nga naglaraw si Abu Dar nga moapil sa Bangsamoro Islamic Freedom Fighters o BIFF nga naglihok sa Mindanao.
Nasayran nga ang grupo ni Abu Dar ang kabahin sa mihimo’g kagubot dihang gisulong sa Maute-ISIS ang katawhan sa Marawi City sa tuig 2017.
