CAGAYAN DE ORO CITY – Mopatigbabaw sa kanunay ang balaod.
Kini ang reaksyon ni City Mayor Oscar Moreno kabahin sa demolasyon nga gipatuman sa konseho sa brgy ngadto sa bana-banang 10-mil ka informal settlers nga gipasulod sa grupo sa mga sindikato sa yuta sa pamilyang Cid sa Sitio Zayas,Upper Carmen ning syudad.
Miingon si Moreno nga sa kanunay ga-pabor ang balaod sa mga kabus apan dili usab mahimo nga ilugon na lamang sa tumang kasayon ang yuta nga gipanag-iya sa mga pribadong tawo.
Una nang gipamugos kaniadto sa grupo ni Datu Makatundag nga dili sila manghawa kon walay relokasyon apan sa pagpatuman na sa demolasyon,wala na kini makita ug ang iyang mga bagani kagahapong adlawa.
Dugtong niini,gimanduan ni Moreno ang hingtungdang mga ahensiya nga gukdon ang grupo nga utok sa pipila ka land squatting gamit ang kabus nga katawhan sa dakbayan.
Wala makaangay ang mayor sa duha ka land squatting gamit ang grupo sa mga lumad partikular sa Brgy Carmen ug Brgy Macasandig ning syudad.
Miingon si Moreno nga gusto niya nga mabulgar atubangan sa publiko ang mga tawo nga mihimo sa maong tinunto ug mataral sa hukmanan aron dili na masubli ang nahitabo sa duha ka brgy sa syudad.
Samtang walay natala ang kapolisan nga kremin samtang gipatuman sa brgy ang demolasyon sa mga payag-payag o istraktura nga ilegal gitukod sa 27 ektaryang yuta sa pamilyang Cid sa maong lugar.
Kini sukwahi sa unang gipanganti sa mga bagani ni Datu Makatundag nga mosukol sila kon pugson nga sudlon sa mga otoridad ang ilang gipamugos nga yutang kabilin.
Namahayag si COCPO spokesperson Maj Evan Viñas nga kuyog ang tropa sa City Mobile Force Batallion,Carmen Police Station ug CDRRMD,nahimong hapsay ang pagpangguba sa illegal structures nga gipanag-iya sa mga tawo nga nailad sa land syndicate nga misulod sa lugar.
Sa pikas bahin,walay matabang ang dakbayan aron kahatagan sa relokasyon ang illegal occupants nga naigo sa demolasyon.
Pagtin-aw kini ni Carmen Brgy Kag Sunny Cahayag kabahin kon angay ba nga maapil sa mahataga’g kabalhinan ang maong mga indibidwal.
Namahayag ang opisyal nga dakong kasupakan sa ordinansa ang gihimo sa maong mga tawo hinungdang dili usab sila matabangan sa gobierno.
Nasuta nga dunay mga kaugalingong balay ang illegal occupants ayha misulod sa nailog nga yuta bugti sa mil-500 pesos bayad sa miaging ma bulan.
