Nagpamalas og kusog nga duwa si Jerom Lastimosa aron pangunahan ang Rookies-Sophomores team sa 154-150 nga kadaogan batok sa Juniors sa PBA All-Star Weekend nga gipahigayon sa Candon City Arena.
Nakapuntos si Lastimosa og 27 puntos diin 14 niini nakuha sa ika-upat nga quarter, samtang nakahatag usab siya og 10 ka assists aron madala sa kadaogan ang ilang koponan.
Midugang og 26 puntos ug 10 rebounds si Brandon Ramirez sa NLEX Road Warriors samtang nakatampo og 20 puntos ug pito ka rebounds si Kai Ballungay.
Nidugang usab og kusog sa Rookies-Sophomores ang mga beterano nga sila Arwind Santos nga may 14 puntos ug Willie Miller nga nakapuntos og upat.
Bisan pa sa kapildihan sa Juniors, misidlak si Ricci Rivero nga may 30 puntos ug 10 rebounds, samtang nakatampo usab si Schonny Winston og 29 puntos ug si Ken Tuffin og 23 puntos.
Una niini, nisidlak usab si Jerrick Ahanmisi human madaog ang 3-point shootout ug ang guards’ obstacle challenge isip pagsugod sa All-Star festivities. (by James Oliver)
