CAGAYAN DE ORO CITY – Ensako nga matuki ug masusi sa mga mahistrado sa Korte Suprema kon nakasubay ba sa konstitusyon ang General Appropriations Act nga napormang balaod aron maoy kuhaan sa sobra P6 trillion sa kagamhanan sa nasud.
Kini ang gipasabot ni Hakbang ng Maisug Davao City member Peter Laviña sa gihimong lakang nila ni former Philippine govt executive secretary Atty. Vic Rodriguez ug Davao City 3rd District Cong. Isidro Ungab nga miduso’g kaso sa korte suprema batok sa administrasyon ni Pres Bongbong Marcos.
Miingon si Laviña nga tinood ang gisulti ni kanhi Pres Rodrigo Duterte nga anaa sa 13 ka pahina nga adunay 18 ka budget blank items’ o nakapangalan sa ahensiya apan walay nalatid nga kantidad sa pondo alang ning tuiga.
Siya miingon nga dakong misteryoso nga bisan gipaubos na sa ratipikasyon sa bicameral committee nga gilangkuban sa pipila ka senador ug mga kongresista apan anaa gihapon ang budget blank items.
Apan igo sa pagpirma ni Marcos sa GAA, kalit na lang kining nakumpleto nga unta ang pagmugna sa tinuig nga pondo alang sa kagamhanan ang trabaho man kini sa magbabalaod.
Bugtong trabaho sa pangulo pag-abot sa nasudnong pondo ang pag-aprobar o pag-veto sa pipila ka budget line items nga makita niini nga dili prioridad o wala kaayu kinahanglana.
Una nang nagkabansiwag ang pipila ka mga senador ug mga kongresista kay adunay miingon nga wala sila’y nakit-ang mga blangko apan may uban usab kanila nagsulti nga ensakto ang gibulgar ni Duterte.
Dumduman nga kusganong gihimakak sa Malakanyang ug namugos mismo si Marcos nga namakak lang daw si Duterte ug Ungab.
Apan sa panig sa iyang igsoon nga si Senador Imee Marcos,mismo siya ang wala mopirma sa bicameral report kay daghang blangko.
Miapas si Executive Secretary Lucas Bersamin sa pag-ingon nga kon adunay mga blangko ug kalit nabutangan,dili kini sa trabaho sa Malakanyang apan sa mga magbabalaod.
