Gihagit ni Wilson C. Amad, usa ka lay theologian, ang mga opisyal sa gobyerno nga mopakita sa ilang suporta alang sa mga residente sa zone 2B Barangay Mambuaya nga nakasinati og panagbingkil sa yuta ug karon hulga sa pagkaputol sa kuryente.
Subay sa pamahayag ni Amad, kwestyonable ang bag-ohay lang nga gihimong raid sa maong dapit tungod kay matud pa walay mga saksi gikan sa media ug mga opisyal sa gobyerno atol sa pagpahigayon sa search warrant.
Dugang pa niini, gibutyag niya nga ang planong pagputol sa kuryente adunay kalambigitan sa giluwatan nga disconnection order gikan sa office of the building official nga karon gisusi na sa ilang abogado.
Aron masiguro ang hustisya, mopasaka matod pa sila og reklamo ngadto sa Commission on Human Rights ug andam usab nila kining ipaabot sa nasyonal nga buhatan kung dili kini aksyonan sa lokal nga lebel.
Busa, nanawagan si Amad sa mga hingtungdan nga opisyal nga unta dili lang magpakahilom ug mohimo og lakang aron panalipdan ang mga residente sa maong barangay.
