Gisaway ni Wilson Amad, usa ka lay theologian, ang komentaryo ni US Vice President JD Vance nga dili unta manghilabot sa politika ug geopolitics si Pope Leo XIV ug magpokus lamang sa ebanghelyo, moralidad ug pagtuo.
Matod ni Amad, ang gingharian sa Diyos naglangkob usab sa political life, busa walay bahin sa kinabuhi sa tawo nga gawas sa paggiya sa Simbahan, lakip na ang politika ug mga isyu sa gyera.
Dugang pa niya, sayop ang panglantaw sa pipila ka mga Katoliko nga dili angay mosulti ang Santo Papa sa mga kalibotang isyu, tungod kay kabahin sa misyon sa Simbahan ang pagdala sa ebanghelyo ngadto sa tanang larangan sa katilingban.
Gipasabot usab ni Amad nga ang theology mao ang natad sa Simbahan ug dili angay diktahan sa mga politiko kung unsaon sa Santo Papa pagpatuman sa iyang tahas isip lider sa Katolikong Simbahan.
Tungod niini, iyang giingon nga ang pagbarug ni Pope Leo XIV sa mga isyu sa kalibutan nagpamatuod sa aktibong papel sa Simbahan sa pagdepensa sa kamatuoran, hustisya ug kalinaw.
