CAGAYAN DE ORO CITY – Nagbahad ang grupong Laywers for Leni nga kasuhan nila ang Comelec kuyog ang deputized govt agencies kon masubli nga ilegal panglakaton ang election materials sa tandem ni Vice Pres Leni Robredo ug Sen Kiko Pangilinan dinhi sa dakbayan.
Kini human unang nagpadala sa sulat-abiso ang maong mga abogado kang City Election Officer Atty Rowel Valledor kabahin sa ilang reklamo.
Gibutyag sa usa sa mga abogado sa grupo nga si Atty Angeline Carrasco Geñoso nga walay katungod ang ahensiya nga pangkuhaon ang campaign materials sa ilang gisuportahan mga kandidato kon kini nakasulod sa pribadong duluna sa yuta.
Gipadumduman usab ni Geñoso ang Comelec sa hukom sa korte suprema tali sa team buhay ug team patay sa Bacolod City diin nagpabor sa dagko nga tarpulin nga gamiton sa political supporters sa kondisyon nga sulod kini sa pribadong pagpanag-iya ug wala gi-display sa publikong lugar.
Samtang giangkon ni Comelec 10 regional director Atty Francisco Pobe nga nagbangga ang balaodn ga nagtugot kanila sa pagpangbaklas ug sa ruling sa korte suprema kabahin sa election campaign materials.
Miingon si Pobe nga gihisgutan usab nila kini tungod sa nahitabo sa mga campaign material sa Leni-Kiko tandem nga naapil sa pagbaklas sa kauluhan bisan sulod sa pribadong pagpanag-iya.
Gibutyag ni Pobe nga may gabayan na kini nga gihatag sa tanang officials sa Comelec sa rehiyon nga dunay ensakto nga koordinasyon alang sa laing hugna sa baklas operasyon aron kalikayan ang susama nga suliran.
