Gatuo si Lead Prosecutor ug Batangas Representative Gerville Luistro nga dunay mas lawom nga hisgutanan sa likod sa pagbiyahe sa China ni Davao City Assessor Engr. Jaime Adalin, human sa mga pangutana ni Senador Raffy Tulfo bahin sa 319 milyon pesos nga remittance gikan sa China padulong sa CALE88.
Matud ni Luistro, kuwestiyonable kaayo ang 25 ka adlaw nga pagpabilin sa grupo nilang Adalin sa China nga dili matud pa normal alang sa usa ka ordinaryong turista lamang, diin giingong miabot sila sa Beijing sa Enero 5 ug nigawas sila sa Shanghai pagka petsa 30 na.
Gikuwestiyon usab sa Kongresista ang nigasto sa maong biyahe ug kung duna bay sisterhood agreement tali sa Davao City ug sa usa ka dakbayan sa China.
Dugtong niini, gipamugos ni Luistro nga kinahanglan maimbestigahan ang mga benepisyo o pribilehiyo nga mamahimong madawat gikan sa foreign government, ilabi na taliwala sa tensiyon sa West Philippine Sea. (raniel mahunyag)
