Dili ikalimod nga legal ug rehistrado ang mga armas ni Vice President Sara Duterte ug sa bana nga si Atty. Mans Carpio, apan kontrobersyal gihapon kini sa impeachment hearing tungod sa pagsulay sa mga prosecutor nga ihikay kini sa kasong grave threats.
Sumala kay Atty. Joseph Sereño sa Sereño Law Office, walay makita nga kalapasan sa balaod kon kompleto sa lisensya ang usa ka tawo ug gitugotan pa gani ang paghupot og sobra 25 ka armas ubos sa Class E license tungod sa hulga sa seguridad sa ikaduhang labing taas nga opisyal sa nasod.
Apan gisaway sa abogado ang paggawas niining nga isyu diha sa hearing tungod kay layo kini ug walay kalabotan sa kasamtangang ginatun-an nga ikaduhang artikulo bahin sa unexplained wealth.
Samtang nagpabilin ang tensyon sa pagdungog, nagpasidaan ang kampo nga ang paggamit sa bahin sa mga armas tuyo lamang aron padak-on ang anggulo sa grave threats imbes nga tumongon ang bug-at nga ebidensya sa kaso.-
