Gibutyag ni Atty. Eddie Cuaresma nga ang unang hearing sa impeachment complaint batok kang Bise Presidente Sara Duterte dili angay tan-awon nga “fishing expedition,” kondili usa ka lehitimong proseso sa pagpangita og kamatuoran. Giklaro niini nga wala siya’y gipanigan bisan sa kampo nila ni Ferdinand Marcos Jr. o Duterte kundili ang interes sa katawhan ang iyang giuna. Sumala ni Cuaresma, ang impeachment usa ka mekanismo aron mapanubag ang mga lider sa ilang mga lihok ug responsibilidad sa nasud. Dugang pa ni Cuaresma, mas angay atubangon sa bise presidente ang imbestigasyon, kay ang inosente walay ikahadlok sa proseso sa balaod. Giingon usab niya nga ang pagpakita ug paghatag og tubag sa hearing makapakita sa transparency ug makatabang sa pagklaro sa tinuod nga kahimtang sa mga alegasyon.
Subay niini, gusto usab ni Cuarema nga makita ang bise presidente nga musulti sa iyang pagka-inosente sa House Committee on Justice aron pamatud-an nga walay buling ang iyang pagserbisyo sa gobyerno, sukwahi sa pasangil nga iyang gi-atubang sa napasa nga duha ka impeachment complaints nga hawid sa komitiba ni Congresswoman Gerville Luistri. Namugos ang legal expert nga ang proseso sa impeachment karon nagkinahanglan og klaro ug ligal nga hearing, subay sa giya sa Supreme Court of the Philippines. Dili kini, matud pa, usa ka “fishing expedition,” kondili lehitimong pamaagi sa pagsuta sa ebidensya ug kamatuoran. Sa ulahi, ang desisyon magpabilin sa plenaryo sa Senate of the Philippines kung dawaton ba o balihon ang rekomendasyon sa komitiba.(by Jane Mae Abulag)
