Tataw nga gapamingwit pa sa ebidensya ang komitiba ni House Committee on Justice Chairman Gerville Luistro sa impeachment complaints batok Bise Presidente Sara Duterte.
Kini ang obserbasyon ni Atty. Rhobert Maestre, inilang political analyst sa syudad.
Sa pakighinabi sa BOMBO RADYO, gitin-aw ni Maestre nga nahuman na ang komitiba sa pagsusi sa supisyente nga porma, unod ug substansya sa reklamo.
Busa, kung ang pagpangita sa probable cause ang hisgutan, kinahanglan nga adunay klarong ebidensya nga nahipos ang komitiba ni Luistro aron madeterminar kung unsa ang kasong ipasaka batok sa Bise Presidente.
Gikadismaya ni Maestre ang lihok sa komitiba nga klaro nga wala pa’y lig-on nga ebidensya, hinungdan nga nagpahutak sila sa pagsubpoena sa Statement of Assets, Liabilities and Net Worth (SALN) dili lamang sa Bise Presidente apan lakip usab ang iyang kapikas nga si Atty. Mans Carpio, kinsa nagpadagan sa usa ka law firm ug adunay gagmay nga negosyo.
Suportado ni Maestre ang pagsupak ni Cagayan de Oro City 2nd District Representative Rufus Rodriguez sa naglabay nga hearing ug mitawag sa proseso sa komitiba ni Luistro isip “largest fishing expedition fleet,” tungod kay wala kini makahatag sa klarong financial overview sa Bise Presidente.
