Wala pay napagawas nga lig-ong ebidensya ang mga magbabalaod aron himoong basihanan sa impeachment proceedings ni Vice President Sara Duterte. Namahayag si political analyst Atty. Rhobert Maestre nga sayop ang pag-isyu sa subpoena alang sa Statement of Assets Liabilities and Networth o SALN tungod kay kulang pa sa “ultimate facts” ang reklamo. Gidugang pa ni Maestre nga ang ebidensya unta kompleto na daan ug naka-attach sa complaint sa dihang kini gisumiter. Gitumbok usab niini nga inay mangita pa sa dugang ebidensya, angay unta tutokan sa komite ang pagdeterminar kung adunay lig-on nga grounds alang sa impeachment. Matud pa sa analista nga nagpadayon gihapon ang pagpangita sa ebidensya bisan dili na kini angay sa maong yugto sa proseso.
Dugtong niini, gitin-aw ni Maestre nga ang hearing sa komitiba ni Congresista Gerville Luistro tataw nga politikal ang kinaiya ug tratamento sa impeachment complaint. Kini nagpasabot nga aduna nay kolor ug bayas ang mga naghawid sa reklamo batok sa bise presidente. Si Maestre miiningon nga bisan pa man sa paggamit sa terminolohiya nga “probable cause”, lahi kini sa criminal case. Ang probable cause nagpasabot lang nga posible adunay basehan ang alegasyon. Hisayran nga subay sa lagda sa House Justice Committee, ang probable cause mao ang pinakaubos nga quantum of proof ug kinahanglan motubag ang akusado sa trial. Sa criminal court, mas taas ang standard sa ebidensya (beyond reasonable doubt), apan sa impeachment, gikinahanglan gihapon ang preponderance of evidence aron masiguro nga lig-on ang kaso. Gidugang pa niya nga ang proseso dili dapat paspas o pataka, apan kinahanglan tarong ug husto ang pagtimbang sa ebidensya. (By Jane Abulag)
