CAGAYAN DE ORO CITY – Gikalipay sa kanhi magtiayong Rosalio ug Dionesia Pacquiao nga giingong mi-retiro na sa pamoksing ang ilang anak nga si eight world division champion Manny Pacquiao.
Miingon ang amahan nga si Rosalio nga dili lalim ang kinabuhi sa boksingero rason nga dugay na nila gikumbinsir si Pacman nga mohunong na kay daghan na kini’g kalampusan sa kinabuhi.
Samtang alang kang Mommy D nga gidungog na sa kahitas-an ang iyang dugay nang hangyo nga makahukom si Pacquiao nga mohunong na sa boksing.
Miingon si Mommy D nga kanunay sila nga anaa sa kiliran ni Pacman aron suportahan sa pagbuhat sa ubang mga butang mahunong lamang ang pagboksing.
Kini ang hinungdan nga dili tiaw ang iyang kalipay dihang nasayran nga gi-anunsyo na ni Pacman ang iyang pag-retiro.
Una usab niini,emosyonal nga nagpasalamat si Pacman pinaagi sa posted video sa iyang Facebook account ang tanang kabahin sa mikuyog kaniya gikan sa kalisod hangtod sa kasamtangang naabtan niini sa kinabuhi.
Gihimo ni Pacman ang pag-anunsyo tungod usab sa iyang pag-atubang sa dakong hagit sa kinabuhi nga mao ang pagpapili sa pagka-presidente sa 2022 elections sa nasud.
Hisayrang sa tuig 2015,miretiro usab si Pacman kay midagan kini pagka-senador ug midaug.
