Kapin na sa 24 ka tuig sukad nahitabo ang 9/11 bombing sa Estados Unidos niadtong Setyembre 11, 2001. Dise-nueva ka mga terorista nga konektado sa al-Qaeda ang mihijack sa upat ka eroplano ug gidumbol kini sa Twin Towers sa New York, sa Pentagon sa Virginia, ug usa ka eroplano ang nabangga sa Pennsylvania human gisukol sa mga pasahero. Kini gilangkoban sa American Airlines Flight 11, United Airlines Flight 175, American Airlines Flight 77, United Airlines Flight 93. Ang maong kalihokan mitugot sa kamatayon sa 2,977 ka tawo, lakip na ang mga biktima sa mga building ug pasahero sa eroplano. Ang mastermind sa maong atake mao si Osama bin Laden, nga napatay sa operasyon sa U.S. niadtong 2011. Ang uban pang mga suspek sama ni Khalid Sheikh Mohammed nadakpan ug giakusahan sa korte. Bisan pa sa kadugayon, ang isyu sa global terrorism wala pa gyud hingpit masulbad ug padayon gihapon ang mga kalihokan sa terorismo sa lain-laing parte sa kalibutan.
Daghan ang natun-an sa kalibutan gikan sa 9/11, lakip na ang kahinungdanon sa security preparedness, intelligence sharing, ug international cooperation. Ang Estadus Unidos nagpatuman sa daghang reporma sama sa Homeland Security Act ug USA PATRIOT Act aron mapugngan ang susamang insidente. Si President Donald Trump sa iyang mga mensahe sa anibersaryo sa 9/11, miyukbo sa mga biktima ug mipadayag sa iyang pagkahiusa sa mga Amerikano sa panahon sa krisis. Miingon siya nga ang mga bayani sa Flight 93 ug mga first responders nagpakita sa kusog ug determinasyon sa nasud. Gipasidunggan niya ang mga tawo nga nagpakamatay aron makaluwas sa uban, sama ni Rick Rescorla, nga iyang gihatagan og Presidential Citizens Medal. Ang mensahe ni Trump nag-awhag sa pagpadayon sa panaghiusa ug pagpanalipod sa nasud batok sa terorismo.
Ang terorismo karon padayon nga hulga sa daghang nasud. Sa Africa, ang Sahel region sama sa Burkina Faso ug Nigeria nahimong sentro sa mga kalihokan sa ISIS ug al-Qaeda. Sa Middle East, aktibo gihapon ang mga grupo sama sa Hezbollah, Hamas, ug Houthis. Sa Asia, ang ISIS-K sa Afghanistan ug Pakistan padayon nga nagbanta sa seguridad sa rehiyon. Sa Russia ug Iran, misaka ang mga insidente sa terorismo sa miaging tuig. Bisan sa Western countries, misaka ang mga lone-wolf attacks ug hate crimes nga konektado sa ideolohiya.
Sa Pilipinas, ang terorismo usa gihapon ka seryosong isyu, ilabi na sa Mindanao. Ang AFP nakaneutralize og kapin sa 500 ka mga miyembro ug supporters sa teroristang grupo sa unang bahin sa 2025. Aktibo gihapon ang mga grupo sama sa New People’s Army ug mga lokal nga extremist groups. Ang gobyerno nagpatuman og Standard Operating Procedures aron mas epektibo ang pag-imbestiga ug pag-prosekutar sa mga kaso sa terorismo.
Ang 9/11 usa ka pahimangno nga ang kalibutan dili luwas sa kalit nga hulga. Kinahanglan ang panaghiusa sa mga nasud aron masugpo ang terorismo ug maprotektahan ang katawhan. Ang kahimtang sa Pilipinas ug sa kalibutan nagpakita nga ang terorismo usa ka padayon nga hagit. Busa, ang paghinumdom sa 9/11 usa ka paalaala sa pag-amping, pagtinabangay, ug pagbarug batok sa kalisdanan.
