Giklaro na sa syudad ug gi-deklarar nga “case closed” na ang isyu kabahin sa giingong leptospirosis outbreak sa Cogon Public Market, atol sa press conference nga gipahigayon sa City Information Office, kagahapon.
Kini human mikaylap ang alegasyon nga adunay 10 ka namatay nga giingong nalambigit sa leptospirosis sa merkado sa Cogon.
Sa maong press conference, mipahayag sila City Council Health Committee Chairperson Councilor Paolo Nicolo Gaane, Acting City Information Officer Jade Adeser, CEEBDA Head Atty.
Marianne Raagas, ug City Health Officer-in-Charge Dr. Claire Paglinawan. Matod ni Dr. Paglinawan, walay natala nga kamatayon sa syudad nga nakumpirmang tungod sa leptospirosis, base sa opisyal nga rekord ug death certificates.
Gipasabot niya nga ang mga giingong kaso adunay lain-laing medical causes ug walay medical basis nga magpakita nga leptospirosis ang hinungdan sa ilang pagkamatay.
Gidasig usab sa syudad ang publiko nga dili mutuo ug dili magpakalat sa walay basihanan nga impormasyon, ug maghulat lamang sa opisyal nga pahayag gikan sa lokal nga kagamhanan. (James Oliver)
