CAGAYAN DE ORO CITY – Gihalaran sa Police Regional Office 10 sa mga gasa ang Leukemia Patients and Parents Organization sa LEUPAPO Foundation sa Brgy Bulua ning syudad.
Nangulo sa maong ‘gift giving’ si PRO 10 regional director Brig Gen Jaysen De Guzman ngadto 70 ka benepesaryo ang mga sinakong bugas,hygiene kits ug grocery items diin nagtumong paghatag kalipay ngadto kanila.
Namahayag ang heneral nga sobra pa kini sa outreach activity kay mi-sentro kini sa paghatag proteksyon sa kinabuhi,dignidad ug paglaum ngadto sa kabataan nga anaa sa grupo.
Gipasabot ni De Guzman nga ang maong kalihukan ang inisyatiba nga naghulagway sa mas lawom pa nga tahas sa PNP nga pagsilbi nga adunay lawom nga pagbati ngadto sa mga sektor nga mas nanginahanglan sa panabang.
Dugtong niini,nalipay pag-ayo ang kabataan ingon man ang mga pamilya nila ug mismong nag-atiman kanila sulod sa foundation.
Hisayrang daghan na sa mga taga-gobierno,pribadong sektor ug indibidwal nga nagpaabot sa ilang pag-amuma sa LEUPAPO sanglit angay sila tabangan gumikan sa ilang mga kahimtang.
