CAGAYAN DE ORO CITY – Gimando karon ni Pres Rodrigo Duterte ang local govt unit officials nga seryosuhon ang pagsusi sa tanang dagko ug tag-as nga gambalay sa ilang tagsa-tagsa ka area of responsibility.
Kini sa tuyo nga makahimo’g ensaktong pagpangandam batok sa mga trahedya sama sa linog nga may kapas moguba sa mga lig-ong gambalay.
Gihimo ni Duterte ang kamanduan tungod sa sunod-sunod nga linog sa Mindanao ilabina sa lungsod sa Tulunan,North Cotabato ug Davao Region nga daghang gambalay ang nangaguba ug may mga residente ang nakabsan sa ilang mga kinabuhi.
Si Duterte ang survivor dihang gitay-og usab sa 6.5 magnitude nga linog ang iyang balay samtang siya anaa sulod sa comfort room niini sa miaging adlaw’ng Huwebes.
Samtang gilayong gimanduan ni City Mayor Oscar Moreno ang city building official ug engineering office nga mosubmitar kaniya sa detalyadong report sa inspection nga gihimo sa mga gambalay nga apektado sa linog ning syudad.
Kini human una nang nakahimo’g pagsusi sila si City Engr Rolando Pacuribot ug OBO head Engr Isidro Obligado sa high rise buildings ug malls nga naigo sa intensity 4 nga epekto sa magnitude 6.6 nga linog sa Tulunan,North Cotabato ning semanaha.
Kini ang tubag ni Moreno sa mando ni Duterte sa LGU officials nga susihon ang govt ug private buildings aron masuta ang kalig-on niini batok sa mga paglinog.
