Nanguna ang Department of Agriculture Region 10 sa pagpadala og mga truck aron libreng hakoton ang mga produktong agrikultural gikan sa mga bukid padulong sa mga merkado ug barangay taliwala sa hulga sa El Niño.
Sumala pa ni DA Region 10 Regional Executive Director Jose Apollo Y. Pacamalan, gihimo kini sa kagamhanan tungod kay miabot sa duha ka gatos ka porsiyento ang gitaas sa presyo sa retail sa Bulua kumpara sa farmgate tungod sa mahal nga gastos sa biyahe.
Sanglit gitabangan sa gobyerno ang transportasyon, ang kamote nga moabot unta sa sisenta pesos ang kilo sa syudad gikan sa napulo hangtod kinse pesos nga palit sa bukid, mapalit na lang sa bayente singko pesos.
Gawas pa niini, nakigtambayayong usab ang buhatan sa mga dagkong kooperatiba sama sa PROCOOP ug FICCO aron maoy magsilbing off-takers nga maghatag og pondo para sa pagpalit sa mga abot sa mga mag-uuma.
