CAGAYAN DE ORO CITY- Natanggong ang libuang motorista ug mga pasahero nga pabiya sa
sentro sa syudad ug ang gikan sa Iligan City sa dul-ag 10 ka oras na diha sa lungsod sa
Opol,Misamis Oriental.
Kini human nahugno ang riprap sa kamulo nga gitukod nga tulay sa
DPWH-10 sa Brgy Igpit sa maong lungsod diin nagresulta sa grabe nga trapiko sukad pa
kagahapon sa buntag.
Gibutyag ni Land Transportation Office regional director Oscar Salcedo nga
tungod sa inisyatiba sa Bombo Radyo,napatawag ang usa ka emergency meeting diin
gipangayua’g sulbad ang UKC Builders contractor kon unsay angay buhaton aron masulbad ang
pagkabukog sa trapiko sa bisinidad sa naguba nga tulay.
Gani,miabag usab ang traffic enforcers gikan sa syudad,mga personahe sa PDRRMO ug kapolisan aron masiguro nga dili mag-counter flow ang mga motorista nga makapasamot sa trapiko.
Una nang nagbaklay ang daghang pasahero aron makauli tungod sa grabeng ka traffic diin miabot ang paglinya sa sakyanan hangtod sa syudad sa El Salvador.
Samtang gitakdang ipatuman sa kagamhanang probinsyal ang truck ban aron makontrol ang paagi sa mga dagkong sakyanan sa apektadong tulay diha sa Brgy Igpit,Opol,Misamis Oriental.
Kini maoy kabahin sa nasabutan sa gipatawag nga emergency meeting nga gitambungan sa halos tanang ahensiya sa gobierno nga may kalabutan sa trapiko sa maong dapit.
Gibutyag ni Misamis Oriental Gob Bambi Emano nga dismayado kini tungod sa nasinatian nga perhisyo sa katawhan epekto sa kakulang sa koordinasyon sa DPWH-10 sa proyekto nga gipatuman sa maong lugar.
Sa pikas bahin,gitumbok sa DPWH-10 nga ang kanunay nga pag-ulan maoy usa sa giingong hinungdan kon nganong nahugno ang riprap sa tulay nga gitukod diha sa Brgy Igpit,Opol sa Misamis Oriental kagahapon sa buntag.
Pag-depensa kini ni DPWH regional spokesperson Vinah Jean Maghinay tungod sa dakong perhisyo nga nasinatian sa katawhan gumikan sa grabeng trapiko epekto sa maong kalpakan.
Gitumbok usab nga naigo ang tubo sa water district sa mga trabahante nga miayo sa tulay hinungdan nga misamot ang paghuyang sa pundasyon sa tulay.
