CAGAYAN DE ORO CITY – Gikatag sa Police Regional Office 10 ang ilang libuang puwersa alayon sa pagtamod sa semana santa ug ang pagsiguro nga dili ma-sabotahe ang taliabot May 9 elections sa Northern Mindanao.
Gibutyag ni PRO 10 spokesperson Lt Col Michelle Olaivar nga pasiunang sobra 600 ka bagitong mga pulis ang ilang ginaug sa headquarters alang sa police visibility ilabina sa mga dagkong syudad sama sa Cagayan de Oro sa pagsiguro nga hapsay ang pagtamod sa mga balaang adlaw ug piliay sa rehiyon.
Giklaro usab niini nga ilusad nila ang lapad nga deployment sa ilang tropa sa nagkadaiyang bahin sa rehiyon sa hinapos nga bahin ning bulana.
Samtang dili magpanuko ang kapolisan pagdakop sa mga kandidato nga mangahas ug binastuson ang kalihukang reliyihoso sa semana santa dinhi sa rehiyon.
Pagdumdom kini ni Olaivar sa tanang kandidato aron likayan nga mohimo’g ‘indirect election campaigning’ nga dakong gidili sa Commission on Elections o Comelec sa pag-obserbar sa semana santa ilabina sa adlaw’ng Huwebes ug Biyernes Santo sa religious site sa Northern Mindanao.
Gihagit ni Olaivar ang tanang kandidato nga makamao nga maulaw ug motahod sa mga kalihukan sa simbahan mismo ning semana santa.
