CAGAYAN DE ORO CITY – Nasudlan sa tubig-baha ang daghang balay nga okupado sa libuang residente sa dakong porsyon sa Brgy Bugo ning syudad.
Kini bisan kon hinay lamang ang pagbundak sa pag-ulan sa syudad ug dili direktang apektado sa bagyong Neneng nga mihatag sa dakong mga pagbaha sa Northern Luzon.
Miingon si Bugo Punong Brgy Vic Talingting nga nakurat sila ug wala makapangandam sa kalit nga tubig-baha nga misulod sa sentrong bahin sa ilang lugar.
Siya miingon nga bisan ang iyang pamilya ang apektado usab sa pagbaha hinungdang naglisod kini sa pagtubag sa emerhensiya nga gipaninggit sa ilang katawhan.
Sa pagkutlo ning balita,na-report nga dunay kanhi sekyu nga nalumos-patay samtang kamulo unta nga luwas sa iyang pamilya gikan sa pagkaipit sa pagbaha kagahapon sa hapon.
Sa miaging semana,apektado usab ang sobra 200 ka pamilya sa Brgy Tablon kay kalit gihapon misaka ang tubig-baha sa Umalag River.
