CAGAYAN DE ORO CITY-Kumbinsido ang PNP nga makuhaan pa ang mga dinagko nga kaso sa mga pagpanulis sa pipila ka dagkong syudad sa Mindanao.
Kini human napatay sa anti-illegal drug operation sa kapolisan ang founder sa Alferez robbery gang nga si Jovenjie Alferez alyas Jojo sa Brgy Sta Maria,Tangub City,Misamis Occidental.
Miingon si Misamis Occidental Provincial Police Director Police Col. Danildo Tumanda nga kanhi napriso si Alferez sa kasong murder ug pagpanulis apan mibalik sa ilegal nga kalihukan sukad nakagawas didto sa Cavite.
Gitumbok ni Tumanda nga grupo ni Alferez ang mitulis sa bangko sa BDO-Osmena Branch ug pawnshop sulod sa SM uptown ning syudad sa nanglabay’ng katuigan.
Samtang gipamugos ni Tumanda nga misukol sa drug-buy bust operation ang napatay nga si Alferez.
Si Tumanda miingon nga kapin usa ka bulan nila nga gi-monitor ang illegal activities ni Alferez.
Narekober sa posisyon sa suspek ang .38 caliber nga pistola ug upat ka sachets sa drugang shabu.
Konektado usab daw ang grupo ni Alferez sa Martilyong Gang nga galamay sa mga Parojinog ug Tyrone criminal syndicate sa Misamis Occidental.
