Gitin‑aw sa buhatan sa CEPALCO nga dili dako nga hinungdan sa misakang electric bill sa pipila ka konsumante ang gitawag nga life line rate subsidy.
Sumala ni CEPALCO Vice President Marilyn Chavez, dugay nang gipatuman ang maong subsidy diin ang ubang konsumante motabang sa pagbayad sa konsumo sa marginalized sector sama sa mga benepisyaryo sa 4Ps.
Iyang gipasabot nga ang mga kwalipikadong life line consumers nga adunay konsumo nga 50 kilowatt‑hours paubos halos wala na’y bayranan sa kuryente tungod kay gisubsidyohan kini sa ubang consumers sa tibuok nasod.
Dugang pa niya, gamay ra usab ang madugang sa bayranan sa matag konsumante tungod kay mokabat lamang kini og usa hangtod duha ka pesos matag billing period.
Sa franchise area sa CEPALCO, mokabat lang sa mga 1,000 ka konsumante ang kwalipikado sa maong programa aron matabangan gihapon silang makagamit og suga ug electric fan sa ilang panimalay.
