Gipasabot sa Department of Social Welfare and Development (DSWD) Region 10 nga dili libre ang kuryente ubos sa lifeline subsidy, kondili diskwento lamang alang sa kwalipikadong kabos nga konsumidor.
Matod ni 4Ps Public Information Officer Oliver Inodeo, ang maong programa ubos sa Lifeline Act of 2022 nga nagtumong sa mga gitawag nga qualified marginalized end‑users, lakip na ang 4Ps beneficiaries ug uban pang kabos nga wala sa programa.
Dugang pa niya, adunay limitasyon sa konsumo niini diin makabenepisyo lamang kadtong dili molapas sa 100 kilowatt hour matag bulan ang kuryente.
Busa, dili tanan awtomatikong makadawat og diskwento. Gipasiugda usab ni Inodeo nga dili angay basolon ang 4Ps kung nganong kanunay silang benepisyaryo tungod kay target lamang sila sa programa ug dili tanan sakop niini makabenepisyo, depende sa konsumo sa kuryente.
Samtang nagpadayon ang energy crisis, giingon ni Inodeo nga dugay nang gipatuman ang subsidy ug gilugway pa kini aron matabangan ang mga kabos sa pag‑atubang sa taas nga presyo sa enerhiya.
