Segun sa nahitabong shooting incident sulod mismo sa usa ka tunghaan sa Tacloban City, isugyot sa pundok sa mga magtutudlo nga Alliance of Concerned Teachers Northern Mindanao nga angay seryosohon sa gobyerno ug sa kadagkuan sa Department of Education ang pagsulbad sa krisis sa edukasyon.
Gipahayag ni Roland S. Cruz nga ang maong insidente usa lamang ka repleksyon sa mas dakong problema nga giatubang karon sa mga estudyante sulod sa mga pasilidad sa pagkat-on.
Hinuon, gihatagan niya og gibug-aton nga kon seryoso gyud ang kagamhanan sa pagpanalipod sa mga bata, kinahanglan gyud silang mamuhunan sa mga tawo ug sa mga imprastraktura nga magseguro sa usa ka luwas nga learning environment.
Busa, gipahinumdoman ni Cruz ang mga hingtungdan nga ang seguridad sa mga tulunghaan nagdepende sa tukmang pagtagad ug paggahin og pundo alang sa kaluwasan sa tanan.
Busa alang sa pundok angayan gayud nga molihok dayon ang mga otoridad aron mapugngan ang pagsubli sa susamang trahedya nga nakahatag og kabalaka sa sektor sa akademya.
