CAGAYAN DE ORO CITY – Walay natala ang Police Regional Office 10 nga ‘crime related incidents’ sa pagsaulog sa katawhan sa adlaw sa mga santos ug kalag diin libuan kanila ang miduaw sa nagkadaiyang menteryo diin nalubong ang ilang mga minahal sa kinabuhi sa Northern Mindanao.
Kini human kompirmaha ni PRO 10 Director Brig Gen Jaysen De Guzman nga generally peaceful ang maong mga kalihukan epekto sa halos 4-mil ka security personnel ang gikatag sa nagkadaiyang menteryo sa rehiyon.
Miingon si De Guzman nga nahimong posibli ang maong kalampusan kay dako’g suporta ang local govt units ug force multipliers aron mahatagan sa igong seguridad ang katawhan nga miagi sa nagkadaiyang transport terminals,pantalan ug tugpahanan ayha makaabot sa sobra 200 ka menteryo sa rehiyon.
Samtang gikompirmar sa Office of the Civil Defense 10 nga nakatala ang PRO-10 sa ‘zero crime related incidents’ sa All Saints- All Souls Days observance sa Northern Mindanao ning tuiga.
Nunot kini sa unang gisulti ni De Guzman kabahin sa ilang gipatuman nga security implementation plan sa maong mga kalihukan.
Miingon si OCD 10 asst regional director Gilbert Conde nga bisan ang nagkadaiyang local disaster offices sa lima ka probinsya ang negatibo sa ilang mga impormasyon may kalabutan sa dili maayong mga hitabo.
Dugtong niini, gipaabot sa OCD ang pagpasalamat sa katawhan sa ilang kooperasyon nga gisunod ang mga lakang gipatuman sa govt forces.
