NAGLISOD sa pag-angkon og limpyo nga tubig ang pipila ka mga apektadong lugar sa Iligan City human sa paglabay sa Bagyong Basyang, sumala ni Tresito Fiel sa Philippine Movement for Climate Justice Iligan, Lanao del Norte.
Namahayag si Fiel sa iyang interbyu sa Bombo Radyo nga naapektuhan karon ang kalidad sa tubig sa syudad, posibleng tungod sa pagkabuslot sa mga tubo sa water lines atol sa pagbaha.
Matod pa ni Fiel, hingpit nga gikinahanglan karon sa mga apektadong katawhan ang pagkaon ug limpyo nga panubig, apan dugay kini nahatagan og prayoridad tungod kay padayon pa ang profiling sa mga biktima ug assessment sa mga kadaut sa syudad.\
Naghinaot usab si Fiel nga pinaagi sa tabang nga gipaabot sa mga simbahan ug parokya, magamay-gamayan ang mga pamilyang nagkalisod sa pagkaon ug tubig sa mga apektadong lugar. (James Oliver)
