GITIN-AW sa Philippine Institute of Volcanology and Seismology (PHIVOLCS) Region 10 nga dili konektado sa linog ang nahitabong landslide sa Davao Bukidnon Road sa Barangay Palacapao, Quezon, Bukidnon pasado alas-10:30 sa gabii niadtong Sabado.
Gibutyag ni Engr. Raineir Amilbahar, OIC sa PHIVOLCS Region 10, sa BOMBO RADYO nga layo ang lugar sa episentro sa linog nga natala sa miaging mga semana. Kini ang rason nga nakadesider ang ilang team nga dili kini earthquake related”.
Gibutyag ni Amilbahar nga aduna lamang tulo ka najor factor kung nganong mahitabo ang pagdahili sa yuta o landslide. Usa niini ang taas nga elevation o daplin sa pangpang (cliff); ikaduha, kung humok ang materyales sa yuta; ug ikatulo, ang triggering mechanism sama sa ulan, linog, o hangin.
Iyang gipatin-aw nga kung magtagbo ang tulo ka komponent sa usa ka lugar, dako ang posibilidad nga maglanslide sama sa nahitabo sa Davao Bukidnon Road diin nahagsa ang 3/4 nga bahin sa dalan.
