CAGAYAN DE ORO CITY – Itunol ning adlawa ang mga housing projects, livelihood programs ug uban pang basic services alang sa mga benepisyaryo sa gilusad nga Convergence Areas for Peace and Development o CAPDev sa ubos sa pagpadagan sa Cabinet Officers for Regional Development and Security (CORDS) ning adlawa.
Mismo si Presidente Rodrigo Duterte ang mi-appoint kang Press Secretary Martin Andanar nga manulo sa CORDS-Northern Mindanao Region.
Gikalipay sa mga rebel returnees ang mga gibubo nga mga programa ilabe na sa Sitio Mainaga, Brgy Iba, Cabanglasan Bukidnon.
Mipasabot si 403rd Brigade Commander General Edgardo de Leon sa publiko nga gipili sa natukod nga Regional Task Force to End Local Communist Armed Conflict ang Cabanglasan tungod sa kasaysayan niining lugar nga kaniadto, gikutahan sa mga rebeldeng New Peoples Army.
“Nagkataon na ang launching ay didto gaganapin sa Barangay Iba, Cabanglasan, ay dating na radicalize. Ginawang radical ng teroristang NPA. Pero eventually, late last year, nagbalik loob yong mga tao sa Sitio Mainaga. May ibat-iba pang mga serbisyong nadarating ngayon didto at mga housing. Mag-aaward din po ng mga housing units para sa mga beneficiaries. Ang bawat ahensya ng government meron ilulaunch na serbisyo”, ingon ni General de Leon.
Lakip sa target sa namugna nga Regional Task Force ang pagsuta sa uban pang mga lugar sa Amihanang Mindanao nga gikonsiderar nga conflict affected areas.
Si Andanar, isip regional chairman sa CORDS maoy magcovene sa uban pang mga sakop sa task force sa Malaybalay City.
Makauban sa kalihim ang maong meeting ang mga Cabinet Secretaries sa gobyerno nga gilakipan ni DND Sec Delfin Lorenzana, Interior Sec Eduardo Año, Security Adviser Hermogenes Esperon Jr, DSWD Sec Rolando Bautista, OPPAP Sec Carlito Galvez. Kuyog sab niini ang presensya ni Cagayan de Oro City Mayor Oscar Moreno regional peace and order council chairman sa region 10 ug si Bukidnon Gov Jose Maria Zubiri Jr, ang chairperson Regional Development Council ning rehiyon.
Kini na ang giilang labing daku, pinaka-una ug makasaysayanong peace initiative sa gobyerno ning tuiga aron sab maimplementar ang nakalatid sa Executive Order no. 70 nga nagmando sa mga naglangkob sa regional task force sa localized peacetalks sulod sa unom ka bulan.
Target sa CORDs nga mapalungtad ang kahusay ug kalinaw sa mga lugar nga sagad atakehon sa mga rebelde.
Mismo si Sec Andanar miangkon nga napilin nila ang Bukidnon kay dinhi sagad gatagu-tago ang mga rebelde.
Naila ang Bukidnon sa daghang tourist destination sites, ug laraw sa gobyerno nga masustinahan ang kalinaw ug preserbasyon sa kinaiyahan busa ilang gipalig-on ang ilang peace initiative sa Northern Mindanao.
