Wala pa’y gilugwa nga tubag si TV actor Enrique Gil sa kompirmasyon ni Fil-Am actress Liza Soberano nga sila halos tulo ka tuig nang nagkabulag.
Kini human angkona sa dalaga pinaagi sa Can I Come In podcast interbyu nga ensakto ang nabantayan sa ilang fans apan mas gipili nila ni Enrique nga dili una angkonon sa publiko nga hingpit nang naputol ang giampingan nila nga relasyon.
Matud sa dalaga nga miuyon siya sa hangyo sa kanhi hinigugma kay anaa kaniya ang kahadlok nga hayan maapektuhan ang iyang karera ug imahen atubangan sa publiko.
Dugang pagsaysay sa dalaga nga bisan dugay na sila nga bulag apan mabati pa gihapon nila ang gugma hinungdan nga mahal pa niini si Gil.
Gani, misantop na sa huna-huna sa dalaga nga magpakasal ngadto sa actor apan wala kini nahatagan sa katumanan gumikan sa hitabo.
Pagklaro ni Liza nga dili dautang tawo si Enrique kay nagkabulag sila nga pulos maayo ang ilang pagkab-ot sa hukom.
Dumduman nga makapila ka higayon nga unod sa mga balita ang panagbulag sa duruha apan pulos sila naghilom ug mga talent manager lamang nila ang misagang sa mga intriga.
Nagsugod ang relasyon sa duruha sa 2014, apan sa tuig 2019 na nila giangkon ug pag-abot sa 2022 nabaniug ang ilang panagbulag diin tuiga lang gikompirmar ni Liza.
Hisayrang kabahin sa mga gibidahan nila nga mga pelikula nga mipaak pag-ayo sa ilang fans ang Just the Way You Are, My Ex and Whys, Dolce Amore, Make it With You ug Forevermore.
