Gipalanog sa student leader ug usa ka estudyante nga si Gayle Escobido ang iyang panawagan sa lokal nga kagamhanan sa dakbayan sa Cagayan de Oro nga mas ipasayon pa ang sistema sa transportasyon sa siyudad tungod sa kalisod sa pagsakay sa mga public utility vehicles nga giatubang sa mga estudyante, trabahante, ug uban pang nagkomyot matag adlaw.
Gipahayag niya sa Bombo Radyo nga ang pagpatuman karon sa City Ordinance No. 10551-2007 usa ka dugang palas-anon sa mga pasahero nga nagsalig lang sa pagkomyot matag adlaw, ug mas angay buhaton sa gobyerno ang paghatag og kombenyenteng biyahe sa mga katawhan imbes nga modugang sa stress ug oras sa pagbiyahe.
Gipasabot usab niya nga ang mga pasahero sa mga provincial public utility vehicles gikan sa mga silingang munisipyo kay dako og natampo sa kalamboan sa siyudad, busa angay lamang nga magkahiusa ang tanan ning panahon sa kalisod imbes nga magbinahinay.
Alang kang Escobido, ang maong hiniusang paningkamot sa komunidad maoy gikinahanglan aron makab-ot ang tinuod nga kaayohan ug solusyon alang sa tanang mga commuter.
