CAGAYAN DE ORO CITY – Gitin-aw ni Atty Jude Sabio nga ang LP-led opposition ang iyang giakusahan nga maoy nagpaluyo sa expose sa self-confessed hitman nga si Edgar Matobato.
Kini ang tubag sa Filipino lawyer sa hagit ni Vice President Leni Robredo nga nganlan ang miyembro sa Liberal Party opposition nga nalambigit sa maong akusasyon.
Sa pakighinabi sa Bombo Radyo, gibutyag ni Sabio nga wala siya’y nakahinabi sa sakop sa LP gawas lamang kay detained Sen Leila de Lima nga maoy nangusog sa reklamo ni Matobato batok kang Pres Rodrigo Duterte.
Una nang gibutyag ni Robredo nga walay kapas ang LP nga moduso’g reklamo sa International Criminal Court.
Samtang subling gihagit ni Sabio si former Senator Antonio Trillanes nga e-withdraw na ang ilang reklamo sa ICC batok kang Duterte.
Kini kon ugaling aduna pay nahabilin nga delicadeza ug gibatunan nga kaulawon ang kanhi magbabalaod.
Matud ni Sabio nga nasabtan na sa publiko nga political propaganda ug pagpangdaut lamang sa administrasyon ni Pres Duterte ang ilang giduso nga reklamo sa ICC.
Una nang gibutyag ni Trillanes nga gi-withdraw ni Sabio ang iyang reklamo sa ICC human wala siya mataga-e sa kanhiay senador sa P75,000 hangtud P100,000 nga monthly allowance ug legal fees isip counsel ni Matobato.
Una usab niini,gitinguha sa Bombo Radyo nga madunggan si Trillanes kabahin sa pasangil ni Sabio batok kaniya apan nagpadala lamang kini sa pipila ka mensahe isip tubag.
