CAGAYAN DE ORO CITY-Gipahimangnuan sa Land Transportation and Franchising Regulatory Board o LTFRB-10 ang taxi operators nga tambagan ang ilang draybers nga dili mamili’g pasahero.
Kini human pormal na nga gilusad sa maong ahensiya ang “OPLAN SNABERO” kauban ang buhatan sa Land Transportation Office o LTO-10.
Matud ni LTFRB regional director Allan Guro nga silotan nila ang operators samtang kuhaan og lisensiya ang draybers nga masapon nga mamili og mga pasahero ilabina ning panahon sa Pasko ug Bag-ong Tuig.
Samtang gibantayan usab sa LTFRB ang mga draybers sa Rehiyon-10 aron masigurong mosunod kini sa bus management.
Kinahanglang mag baton ang mga bus og duha ka drayber kon ugaling layo ang byahe niini.
Matud ni Guro nga kinahanglang hangtud lang sa unom ka oras ang pag drive sa driver ug pulihan na kini sa ka-relibo.
Dakong silot ang atubangon sa mga makalapas sa maong balaud.
