CAGAYAN DE ORO CITY-Ipatawag ug ipa-esplikar sa city council ang LTFRB-10 kon nganong gitugtan nila ang re-calibration sa mga taxi hinungdan nagsaka ang bayronon sa mga pasahero nga nagsakay niini.
Kini human mihimo’g special report si Kag Bong Lao, chairman sa komitiba sa public utilities sa konseho sa reklamo sa pipila ka taxi passengers ning syudad.
Giangkon ni Lao nga nakurat kini kay wala moagi sa konsultasyon ang taxi re-calibration sa mga operator ning syudad.
Samtang dili na angay konsultahon ang konseho sa taxi-recalibration nga epektibo na sa syudad sa miagi pang mga semana.
Tubag kini ni LTFRB regional director Allan Guro sa pagkakurat sa konseho sa pagsaka sa pletehan sa mga taxi sa syudad.
Miingon si Guro nga mangayo usab sila’g giya sa ilang central office kon ensakto ba nga moagi pa kini sa city council kon dunay himoong re-calibration sa mga taxi.
Nasayran nga gawas sa 40 pesos nga flagged down rate, may madugang nga 13 pesos ug 50 sentabos ug laing 3 pesos ug 50 sentabos isip kabahin sa pagre-calibrate sa mga taxi.
