CAGAYAN DE ORO CITY-Gipanganti sa grupong STAREX-PISTON Northern Mindanao nga subli i-paralisar ang dagan sa trapiko isip pagpakita sa pagsupak sa ipatuman nga public utilities vehicles modernization program.
Panganti kini ni STAREX-PISTON Northern Mindanao Sec Gen Ringo Lago samtang gipangandaman nila ang lihok-protesta atubangan sa LTFRB-10 ning syudad sunod semana.
Miingon si Lago nga hayan labwan pa nila ang duha ka adlaw nga transport strike sa tuig 2017 kon pabiling dili sila paminawon sa gobierno kabahin sa ilang pagsupak sa maong programa.
Samtang gihangyo apan adunay pakapin bahad ni LTFRB regional director Allan Guro ang transport sector nga dili moduyog sa protesta nga himoon sa STAREX-PISTON Northern Mindanao ning syudad sunod semana.
Gibutyag ni Guro nga tigumon niini ang mga operator ug PUJ drivers aron ipasabot ang ilang importanteng papel sa sektor sa transportasyon kon dili mohimo pagbiyahe.
Una nang nagbahad si Guro nga silotan subay sa gabayan sa DOTr kadtong transport group nga mouban sa protesta batok sa ilang opisina sunod semana.
Nasayran nga mismo na si Presidente Rodrigo Duterte ang nagbahad nga pangdakpon ang mga driver nga mogamit pa gihapon sa karaang mga PUJ.
