Gipahugtan sa Land Transportation Franchising and Regulatory Board Region 10 ang ilang kampanya batok sa mga drayber ug pampublikong sakyanan nga wala nagtuman sa mga lagda sa kalsada.
Giklaro ni LTFRB Region 10 Regional Director Aljo Bendijo nga wala lang gipunting sa maong operasyon ang mga sasakyan nga kolorom kon dili apil na usab ang mga sakyanan nga dugyot, bulok, ug dili na roadworthy.
Gawas niini, gipahayag sa opisyal nga susihon usab ang pagka-disente sa mga drayber sa PUJ pinaagi sa pagtsek sa ilang hustong sanina sama sa pagsul-ob og de-kulyo nga polo shirt ug pantalon imbes nga mag-sando, mag-shorts, ug mag-tsinelas samtang nagbiyahe.
Gitug-an usab ni Bendijo nga ipadayon nila ang pagsuta sa mga probisyon sa prangkisa, operating authorities, ug uban pang mga mandatory documents aron masiguro nga patas ug propesyonal ang serbisyo sa pampublikong transportasyon sa rehiyon.
