CAGAYAN DE ORO CITY-Dili pa hingpit nga ipatuman sa LTO Region 10 ang ‘Anti-Distracted Driving Law’ ugmang adlawa.Kini bisan kon sa Hulyo 6 ang gitakdang petsa sa pagpatuman sa maong balaod human ipublikar sa mga mantalaan sulod sa 15 ka adlaw.
Miingon si LTO regional director Oscar Salcedo nga magpahigayon una sila’g ‘information dessimination’ ngadto sa publiko, ilabina sa drivers ayha nila hingpit nga ipatuman ang balaod karong Hulyo 17 ning tuiga.
Nanganti si Salcedo nga istrikto nilang ipatuman ang balaod batok sa mga drivers nga mosupak niini pinaagi sa pag-gamit sa ilang mga gadgets sama sa cellphone ug tablets samtang nagmaneho ug sakyanan.
Gihangyo ni Salcedo ang publiko ilabina ang drivers nga mosanong sa ilang ipatuman nga ‘Anti-Distracted Driving Law’.
Matud ni Salcedo nga walay laing tumong ang nasampit nga balaod kundili ang pag-protiher sa katawhan batok sa posibleng disgrasiya sa kadalanan.
Apan namahayag si Salcedo nga pwedeng makagamit sa ilang cellphone ang mga drivers samtang nagmaneho kon adunay emerhensiya sama sa sunog ug kremin.
Dugang ni Salcedo nga bisan ang mga pasahero ilang dakpon kon gagamit kini sa ilang cellphone samtang milabang sa pedestrian lane.
