CAGAYAN DE ORO CITY- Ralihan sa mga residente ingon man sa mga opisyales sa Brgy Puerto ang buhatan ni Land Transportation Office regional director Oscar Salcedo diha sa Brgy Bulua ning syudad.
Kini human supaka nila ni Puerto Brgy Kap Ian Achas ang tinguha ni Salcedo nga ibalhin ang extension office sa LTO-Puerto sa Brgy Agusan sa syudad sunod semana.
Miingon si Achas nga dili makiangayon nga wad-on ni Salcedo ang extension office sa LTO-Puerto kay mawad-an sa panginabuhi ang ilang katawhan.
Samtang wala kahadloki ni LTO Salcedo ang bahad ni Puerto Brgy Kap Ian Achas nga siya ralihan sa katawhan.Kini human bug-os na ang hukom ni Salcedo nga hingpit ibalhin ang ilang extension office sa Brgy Agusan tungod sa kapiot sa espasyo sa Brgy Puerto.
Namugos si Salcedo nga dili mahimong mapihig ang interes sa publiko tungod lamang sa pagbabag sa konseho sa Brgy Puerto ug insurance group.
Dismayado si Salcedo kay miabot na lamang sa kapi’g tuig,pakyas gihapon si Achas makakita’g lu-ag nga luna aron mabalhin ang LTO extension office sa iyang barangay.
