Gilauman ang pagdagsa sa daghang mga pasahero sa tanang bus terminals, seaports ug airports sa rehiyon samtang nagkadool na ang adlaw sa Kalag-Kalag.
Namahayag si Santino Aguilar, Law Enforcement Chief sa Land Transportation Office Region 10 nga mipatuman ang ilang ahensya sa istriktong monitoring sa road worthiness sa mga pampublikong sakyanan aron masiguro nga luwas gamiton sa pagbiyahe ang mga saksyanan paingon sa mga probinsya.
Mipasabot ang opisyal nga kung masuta nga “unsafe” o depektoso ang maharang nga sakyanan, hatagan nila kini’g “change pass”, ug insigida, dili tugutan nga mubiyahe hangtod matul-id ang sakyanan.
Mipasidaan si Aguilar ilabe na sa mga dagkung trak, depampasaherong jeep, ug bus nga ilang dakpon ang drayber kung mapamatud-ang bagsak sa ilang roadside inspection.
Gawas sa pagkompiskar sa lisensya, may tsansa pa nga marekobar ang prangkisa sa ilang gihuptang sakyanan.
Kagahapon, walay nadakpan ang LTO -10 sa ilang operasyon sa Misamis Oriental.
