CAGAYAN DE ORO CITY-Gihaya sa tugkaran sa kapolisan ang mga lungon diin nakasulod ang tulo ka batan-on nga gi-salvage patay sa Brgy Sta Ines, Malitbog,Bukidnon.
Kini aron ipaabot ang mensahe nga gusto sa mga tagtungod nila Clifford Abales, 21; Vincente Benin, 24; ug Don Graymar Andales, 23, pulos mga residente sa lungsod sa Villanueva, Misamis Oriental nga mahatagan sa kasulbaran sa Tagoloan PNP ang ilang mga kamatayon.
Gibutyag sa inahan nga si Maria Andales nga unta matumbok ang mipatay sa iyang anak aron kasuhan niya sa korte.
Una nang giangkon sa Tagoloan PNP nga gipapauli nila ang mga biktima human ma-imbestigaran sa pasangil nga nangawat sa celphone sa maong lungsod sa miaging semana.
Samtang gisaway ni PNP regional spokesperson Supt Surki Serenias ang lihok-protesta nga gipahigayon sa mga pamilya sa tulo ka batan-on nga gitoohang gi-salvage sa probinsiya sa Bukidnon.
Si Serenias miingon nga kon gusto sa pamilya nila ni Abales, Vienen ug Andales nga mahatagan sa hustisya ang ilang kamatayon, kinahanglang magpasaka’g kini’g kaso sa korte.
Dugang ni Serenias nga dili ang pagsinggita daplin sa dalan ang makahatag hustisya kanila kundi ang korte nga modungog sa kaso.
