CAGAYAN DE ORO CITY – Gikondinar sa konseho ang gihimong lakang sa Local Water Utilities Administration o LWUA nga paglugwa sa dugang unom ka bulan nga dumalahon sa interim management ang Cagayan de Oro Water District o COWD ning syudad.
Kini human nagpasar sa resolusyon si City Councilor Majority Leader Kag. Edgar Cabanlas tungod sa nahatag nga kalibog sa LWUA nga duha na ka management ang nagdala sa COWD.
Miingon si Cabanlas nga tungod sa gihimo sa LWUA, mabutang sa alanganin ang pag-alagad sa COWD kay mabahin man ang pagsanong sa mga empleyado kon kinsa ang angay sundon tali kang interim General Manager Fermin Jarales ug acting regular General Manager Engr Edna Najael.
Sa gihimong botasyon, 11 sa mga konsehal ang misanong nga pagkondinar batok LWUA samtang upat ang supak.
Nagsumikad ang suliran sa COWD kay adunay gisingil nga utang ang Metro Pacific Waters pinaagi sa Cagayan de Oro Bulk Water Incorporated nga sobra 400 milyones pesos nga outsanding obligation nga dili bayran kay wala sa ilang book of records.
Hisayrang mi-resulta na sa pagkinasuha ang isyu sa COWD ug COBI diin gisakyan usab sa mga politiko gamit ang argumento nga tungod kini sa interes sa katawhan sa dakbayan.
