CAGAYAN DE ORO CITY – Gikan sa pagsilbing dakong supak,suportado na ni City Mayor Klarex Uy ang full takeover sa Local Water Utilities Administration o LWUA sa internal affairs sa Cagayan de Oro Water District o COWD ning syudad.
Kini human unang gitulisok sa mayor ang lakang ni Cagayan de Oro 1st District Cong. Lordan Suan nga midangop sa LWUA aron masulbad ang bangi tali COWD ug Cagayan de Oro Bulk Water Incorporated tungod sa utang.
Namahayag ang bag-ong tigpamaba sa buhatan sa mayor nga si Janboy Actub,ang pagdawat ug pagpahurar sa LWUA appointed interim board of directors ug interim general manager indikasyon sa pagsanong sa city govt sa mando ni Pres Bongbong Marcos.
Apan direkta usab kining mihangyo sa interim officials nga mahatagan na sa sulbad ang gisagubang nga suliran sa COWD ilabina ang isyu sa bayrunong minilyong pirmi gisingil sa COBI.
Ang pagsulod sa interim officials epekto sa pagkagapos sa COWD sa impluwensiya sa politika sa mga opisyal sa syudad.
Dumduman nga sa kamulo pa nga pag-imbestigar ang task force ug fact finding sub-committee sa konseho batok Metro Pacific Water ug COBI,nagpalugwa’g manifesto ang mayoriyang ihap sa brgy kapitanes sa syudad aron kontrahon ang LWUA takeover sa COWD.
Apan sa paghidangat ug pakigpulong ni Marcos sa usa ka kalihukan sa syudad sa miaging Mayo ning tuiga,prangkang gimando niini ngadto sa LWUA ang pagtoon ug sudlan ang pagdumala sa COWD aron dili madehado sa serbisyong panubig ang libuang mga konsumante.
Dugtong usab niini,miingon si kanhi City Mayor Atty Oscar Moreno nga dili angayang mahimong ulipon sa appointing power o sa kasamtangang mayor ang board of directors apan mismo sa sudlan ug serbisyuhan nila nga korporasyon.
Kini ang pag-edukar ni Moreno ngadto sa regular board of directors sa COWD nga alang kaniya nagpagapos ug nagpa-dektar sa impluwensiya sa city hall.
Namahayag ang kanhi mayor nga kini ang rason nga gihaw-as ni Marcos pinaagi sa pagtahas sa LWUA aron magbutang sa interim officials nga gawasnong mosulbad sa mga gisagubang nga mga problema niini.
Dumduman usab nga kanunay ibalik-balik sa city govt nga kon nakautang sa minilyong obligasyon ang COWD, angay basulon si Moreno kay gipasulod ang MetroPac Water dinhi sa syudad.
