CAGAYAN DE ORO CITY – Gipangayo sa kadagkuan sa Local Water Utilities Administration o LWUA sa talahurong hukmanan nga mahatagan sa konsiderasyon ang gipakanaug nila nga hukom sa prohibition case batok kanila nga unang giduso sa set aside regular board of directors sa Cagayan de Oro Water District o COWD ning syudad.
Kini human midason sila sa motion for reconsideration o MR nga gi-representahan sa Office of the Government Corporate Counsel o OGCC kabahin sa hukom sa Regional Trial Court o RTC Branch 41 nga kanhi gihuptan ni Court of Appeals Justice Joeffre Acebido.
Namahayag ang OGCC nga angayang mahatagan sa konsiderasyon sa korte tungod kay wala mohimo’g pag-abusar sa gahom ang LWUA pag-takeover sa COWD diin gipahimutangan sa interim officials nga pinasubay sa balaod.
Gipunto usab sa LWUA nga wala tagda sa korte ang malangkubon nga pagpasabot sa OGCC sa gitawag nga financial assistance contract aron mohatag unta’g kalamdagan kabahin sa presensiya nila sa COWD.
Kini ang rason nga mihangyo sila nga mahatagan sa konsiderasyon ang LWUA full takeover,inay wad-an sa katungod pagpatuman sa mga lakang nga nag-sentro sa ikaayo sa COWD.
Gipasabot pa sa LWUA nga kung adunay silotan tungod sa wala pagsanong sa mando sa korte,kini ang panig sa regular management kay dayag nga dili pa pinal ang hukom kay gitugot sa balaod ang pagduso sa mosyon.
Dugang sa OGCC nga imbis adunay status quo apan mihimo’g mga lakang ang regular management nga pagsupak sa unsay kasuguan sa korte.
Dumduman nga nagka-komosyon sa miaging Abril 16 sa buntag kay naglugwa na’g mando ang regular COWD mngt nga dili na pasudlon sa opisina si interim General Manager Fermin Jarales aron pagkuha sa mga giingong mga importanteng dokumento kabahin sa bank transactions ingon man nagpunting sa mga kasong administratibo ug kreminal batok sa pikas grupo.
Apan gipugngan makasulod rason naguba ang glass door sa COWD ug gipa-kustodiya ang mga dokumento sa kapolisan aron magsilbing neutral samtang gipaubos sa imbentaryo.
Nanganti ang panig sa regular mngt nga kasuhan ang grupo ni Jarales apan sila miklaro sa ilang apelar sa korte nga pabiling legal ang presensiya nila sa COWD tungod sa ‘status quo’ rason gikuha ang pipia ka mga dokumento.
Hisayrang ang presensiya sa LWUA pinasikad sa mando ni Pres Bongbong Marcos sukad Mayo 2024 tungod sa isyu nga nakaabot kaniya kabahin sa gisingil sa Cagayan de Oro Bulk Water Incorporated o COBI sa ilang pag-suplay sa tubig apan wala tahura sa regular COWD mngt ug hinoon gikuwestiyon didto sa korte.
