CAGAYAN DE ORO CITY – Gihagit sa laing higayon sa Area Police Command- Eastern Mindanao kuyog sa militar ang nabiling mga sakop sa CPP-NPA nga hingpit nang talikdan ang ilang nagkahuyang nga armadong pakigbisog batok sa gobierno.
Gihimo ni Area Police Command- Eastern Mindanao officer-in-charge Maj Gen Harold Tuzon ang panawagan pinaagi kang APC-EM Executive Officer Col Orly Quillen atol sa presentasyon sa mga armas ug kagamitan sa gubat sa Camp Alagar ning syudad.
Miingon si Quillen nga maong mga armas ang nabawi sa hiniusang operasyon sa local police ug 1st Special Forces Batallion Regimen,Philippine Army nga gipanglubong sa Brgy. San Rafael, Talakag, Bukidnon.
Siya miingon nga kanunay maghulat ang gobierno sa pagkanaug sa mga rebelde sa bukid aron mobalik sa kinabuhing normal kuyog sa ilang mga pamilya.
Tipik sa nakalot sa govt forces ang mga armas nga lima ka M16 rifles, caliber 45, 38 assorted magazines ug mga bala nga iya sa Platoon Mercedes,Sub-Regional Committee 5 nga ubos North Central Mindanao Regional Committee.
