CAGAYAN DE ORO CITY – Kasuhan sa pagsupak sa Graphic Health Warning Law ang 38 anyos nga babaye nga nabawian sa suspected smuggled cigarettes nga unang naharang sa checkpoint operation sa Purok 1,Bansarvil -1,Kapatagan,Lanao del Norte.
Giila ni Lanao del Norte Police Provincial Office Director Col. Roy Magsalay ang dinakpan nga si alyas Maam Fe nga nagpuyo sa lungsod sa Sultan Naga Dimaporo,LDN.
Siya miingon nga ang tropa sa 2nd Provincial Mobile Force Company sa Lanao Norte PNP ang nakaharang sa motorsiklo nga gibayran sa suspek diin naka-karga ang klase-klaseng sigarilyo nga nagbalor 200-mil pesos.
Gilayong gipaubos sa dugang imbestigasyon ang suspek ug gitugyan sa 2nd PMFC ang mga nabawing sigarilyo sa Bureau of Customs Iligan City District Office.
Makadaghang higayon na nga nakadakop ang tropa sa PNP-Lanao del Norte sa mga kontrabando sukad gipatuman sa Kampo Krame ang anti-smuggling operations isip tabang sa BoC batok sa mga sindikato nga utok sa mga kalihukang ilegal.
