Masubo ang pagselebrar sa Labor Day sa mga mamumuo sa Macajalar Labor Union, matod ni Joel Tongco, presidente sa unyon, tungod sa nagpadayon nga krisis ug ubos nga sweldo nga ilang nasinati karon.
Sumala ni Tongco, bisan adunay pagtaas sa suweldo sa pipila ka sektor, dili gihapon kini igo tungod sa pagsaka sa presyo sa mga palaliton ug serbisyo.
Dugang pa niya, nagpadayon ang isyu sa wage distortion ilabina sa mga kompanya diin dili patas ang implementasyon sa pagtaas sa sweldo.
Giingon usab ni Tongco nga ang maong kahimtang naghatag og dugang kabug-at sa mga trabahante nga naglisod na gani sa adlaw-adlaw nga panginabuhi.
Busa, nanawagan ang unyon nga hatagan og mas seryosong pagtagad sa gobyerno ug mga employer ang kahimtang sa mga mamumuo aron mahatagan sila og hustong benepisyo ug sweldo.
