CAGAYAN DE ORO CITY – Kumbisindo si Senate blue ribbon committee chairman Sen. Richard Gordon nga may naglihok nga ‘mafia group’ sulod sa Bureau of Corrections ug New Bilibid Prison rason paspas gibuhian ang mil-700 ka convicted criminals.
Kini human nasuta sa imbestigasyon nga gibaligya sa maong mga buhatan ang pagpatuman sa Good Conduct Time Allowance o GCTA Law sukad tuig 2013.
Miingon si Gordon nga adunay asawa sa usa sa mga piniriso nga nakagawas tungod sa GCTA apan nagbayad sa 50-mil pesos.Kini ang hinungdan nga napugos si Pres Rodrigo Duterte pagtangtang kang BuCor Dir Gen Nicanor Faeldon.
Samtang giuyunan ni Gordon ang kamanduan ni Justice secretary Menardo Guevarra nga warrantless arrest sa mga konbiktado sa henious crimes nga nakagawas tungod sa GCTA.
Miingon si Gordon nga angay lamang arestuhon ang maong mga personalidad bisan nga wala nay warrant of arrest gumikan kay igo lamang kini ipangbalik sa presohan.
Una niini,may convicted criminals nang boluntaryo mitahan sa Bilibid human imando ni Pres Rodrigo Duterte ang pagpabalik kanila sa prisohan.
Samtang supak ang usa sa mga author sa GCTA law sa mando ni Guevarra nga ipaubos sa warrantless arrest ang mil- 914 heinous crime convicts nga naka-benepisyo sa maong balaod.
Gibutyag ni Cagayan de Oro 2nd District Rep Rufus Rodriguez nga kinahanglang moduso sa korte sa motion to re-arrest aron makapaggawas sa warrant of arrest batok sa convicted criminals.
Siya miingon nga dili makatarunganon nga dakpon na lamang nga walay warrant ang mga nakapahimulos sa GCTA law ilabina nga sayop sa Bureau of Corrections ang paghatag kanila’g kaggawasan.
Apan gipamugos ni Regional State Prosecutor Merlynn Uy nga mahimo nga ipaubos sa warrantless arrest ang 1,914 heinous crime convicts nga naka-benepisyo sa GCTA.
Siya miingon nga tungod kay sayop ang paghatag kanila sa kagawasan hinungdan nga makonsiderar kini nga “null and void” sa korte.
Una nang gimando ni Pres Rodrigo Duterte nga e-shoot to kill ang mga magdumili sa pagtahan sa ilang kaugalingon nga unang nakabenepisyo sa GCTA.
