CAGAYAN DE ORO CITY – Andam moatubang ang kampo sa mag-amahan nga si City Mayor Rolando ‘Klarex’ Uy ug Carmen Punong Brgy Kikang Uy sa hawanan sa kamarabaha.
Kini human sila imbitara sa committee on suffrage and electoral reforms aron mohatag katin-awan sa isyu nga grabe ang pagsaka sa ihap sa mga bag-ong botante sa maong brgy sa miaging voters registration sa tuig 2024.
Gibutyag sa abogado ni Kikang nga si Atty Al An Geñoso nga walay suliran alang kanila ang pagtunga sa imbitasyon kay daan na nila kini gipangandaman.
Siya miingon nga bugtong nakahatag kanila’g tanghaga kay nganong ipatawag pa sila nga unta gibasura naman sa Commission on Elections o Comelec ang disqualification case batok Kikang.
Nagtoo man gud sila nga kini ang pinakabug-at nga rason kon nganong adunay nahimong lakang ang kamarabaha niini.
Giakusahan si Kikang nga migamit sa iyang impluwensiya aron pasudlon ang daghang mga bag-ong botante nga magamit niya nga puwersa batok kang Cagayan de Oro 1st District Cong. Lordan Suan sa May 12 elections.
Sa miaging pagpatawag niadtong Disyembre diin andam na unta ang mag-amahan,wala nadayon kay mas giuna ang pagtuki sa BARMM election preparations.
Sa maong pagpatawag ugmang adlawa,dili makatunga si Mayor Klarex kay mitunong kini sa kasaulugan sa Chinese New Year rason nga magpadala lang kini’g represetante.
